Song of Solomon 2
Study Bible
The Bride

אֲנִי֙  חֲבַצֶּ֣לֶת  הַשָּׁר֔וֹן  שֽׁוֹשַׁנַּ֖ת  הָעֲמָקִֽים׃ 

Solomon

כְּשֽׁוֹשַׁנָּה֙  בֵּ֣ין  הַחוֹחִ֔ים  כֵּ֥ן  רַעְיָתִ֖י  בֵּ֥ין  הַבָּנֽוֹת׃ 

The Bride

כְּתַפּ֙וּחַ֙  בַּעֲצֵ֣י  הַיַּ֔עַר  כֵּ֥ן  דּוֹדִ֖י  בֵּ֣ין  הַבָּנִ֑ים  בְּצִלּוֹ֙  חִמַּ֣דְתִּי  וְיָשַׁ֔בְתִּי  וּפִרְי֖וֹ  מָת֥וֹק  לְחִכִּֽי׃ 

הֱבִיאַ֙נִי֙  אֶל־  בֵּ֣ית  הַיָּ֔יִן  וְדִגְל֥וֹ  עָלַ֖י  אַהֲבָֽה׃ 

סַמְּכ֙וּנִי֙  בָּֽאֲשִׁישׁ֔וֹת  רַפְּד֖וּנִי  בַּתַּפּוּחִ֑ים  כִּי־  חוֹלַ֥ת  אַהֲבָ֖ה  אָֽנִי׃ 

שְׂמֹאלוֹ֙  תַּ֣חַת  לְרֹאשִׁ֔י  וִימִינ֖וֹ  תְּחַבְּקֵֽנִי׃ 

הִשְׁבַּ֨עְתִּי  אֶתְכֶ֜ם  בְּנ֤וֹת  יְרוּשָׁלִַ֙ם֙  בִּצְבָא֔וֹת  א֖וֹ  בְּאַיְל֣וֹת  הַשָּׂדֶ֑ה  אִם־  תָּעִ֧ירוּ ׀  וְֽאִם־  תְּעֽוֹרְר֛וּ  אֶת־  הָאַהֲבָ֖ה  עַ֥ד  שֶׁתֶּחְפָּֽץ׃  ס 

The Bride's Adoration

ק֣וֹל  דּוֹדִ֔י  הִנֵּה־  זֶ֖ה  בָּ֑א  מְדַלֵּג֙  עַל־  הֶ֣הָרִ֔ים  מְקַפֵּ֖ץ  עַל־  הַגְּבָעֽוֹת׃ 

דּוֹמֶ֤ה  דוֹדִי֙  לִצְבִ֔י  א֖וֹ  לְעֹ֣פֶר  הָֽאַיָּלִ֑ים  הִנֵּה־  זֶ֤ה  עוֹמֵד֙  אַחַ֣ר  כָּתְלֵ֔נוּ  מַשְׁגִּ֙יחַ֙  מִן־  הַֽחֲלֹּנ֔וֹת  מֵצִ֖יץ  מִן־  הַֽחֲרַכִּֽים׃ 

10 עָנָ֥ה  דוֹדִ֖י  וְאָ֣מַר  לִ֑י  ק֥וּמִי  לָ֛ךְ  רַעְיָתִ֥י  יָפָתִ֖י  וּלְכִי־  לָֽךְ׃ 

11 כִּֽי־  הִנֵּ֥ה  [הַסְּתָו  כ]  (הַסְּתָ֖יו  ק)  עָבָ֑ר  הַגֶּ֕שֶׁם  חָלַ֖ף  הָלַ֥ךְ  לֽוֹ׃ 

12 הַנִּצָּנִים֙  נִרְא֣וּ  בָאָ֔רֶץ  עֵ֥ת  הַזָּמִ֖יר  הִגִּ֑יעַ  וְק֥וֹל  הַתּ֖וֹר  נִשְׁמַ֥ע  בְּאַרְצֵֽנוּ׃ 

13 הַתְּאֵנָה֙  חָֽנְטָ֣ה  פַגֶּ֔יהָ  וְהַגְּפָנִ֥ים ׀  סְמָדַ֖ר  נָ֣תְנוּ  רֵ֑יחַ  ק֥וּמִי  [לְכִי  כ]  (לָ֛ךְ  ק)  רַעְיָתִ֥י  יָפָתִ֖י  וּלְכִי־  לָֽךְ׃  ס 

Solomon

14 יוֹנָתִ֞י  בְּחַגְוֵ֣י  הַסֶּ֗לַע  בְּסֵ֙תֶר֙  הַמַּדְרֵגָ֔ה  הַרְאִ֙ינִי֙  אֶת־  מַרְאַ֔יִךְ  הַשְׁמִיעִ֖ינִי  אֶת־  קוֹלֵ֑ךְ  כִּי־  קוֹלֵ֥ךְ  עָרֵ֖ב  וּמַרְאֵ֥יךְ  נָאוֶֽה׃  ס 

15 אֶֽחֱזוּ־  לָ֙נוּ֙  שֽׁוּעָלִ֔ים  שֽׁוּעָלִ֥ים  קְטַנִּ֖ים  מְחַבְּלִ֣ים  כְּרָמִ֑ים  וּכְרָמֵ֖ינוּ  סְמָדַֽר׃ 

The Bride

16 דּוֹדִ֥י  לִי֙  וַאֲנִ֣י  ל֔וֹ  הָרֹעֶ֖ה  בַּשּׁוֹשַׁנִּֽים׃ 

17 עַ֤ד  שֶׁיָּפ֙וּחַ֙  הַיּ֔וֹם  וְנָ֖סוּ  הַצְּלָלִ֑ים  סֹב֩  דְּמֵה־  לְךָ֨  דוֹדִ֜י  לִצְבִ֗י  א֛וֹ  לְעֹ֥פֶר  הָאַיָּלִ֖ים  עַל־  הָ֥רֵי  בָֽתֶר׃  ס 

Study Bible © 2011 - 2013 by Biblos.com in cooperation with Helps Ministries. For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Section Headings Courtesy INT Bible © 2012, Used by Permission

Bible Hub

Song of Solomon 1
Top of Page
Top of Page