Job 35 WLC 1ויען אליהו ויאמר׃ 2הזאת חשבת למשפט אמרת צדקי מאל׃ 3כי־תאמר מה־יסכן־לך מה־אעיל מחטאתי׃ 4אני אשיבך מלין ואת־רעיך עמך׃ 5הבט שמים וראה ושור חקים גבהו ממך׃ 6אם־חטאת מה־תפעל־בו ורבו פשעיך מה־תעשה־לו׃ 7אם־צדקת מה־תתן־לו או מה־מידך יקח׃ 8לאיש־כמוך רשעך ולבן־אדם צדקתך׃ 9מרב עשוקים יזעיקו ישועו מזרוע רבים׃ 10ולא־אמר איה אלוה עשי נתן זמרות בלילה׃ 11מלפנו מבהמות ארץ ומעוף השמים יחכמנו׃ 12שם יצעקו ולא יענה מפני גאון רעים׃ 13אךש־וא לא־ישמע ׀ אל ושדי לא ישורנה׃ 14אף כי־תאמר לא תשורנו דין לפניו ותחולל לו׃ 15ועתה כי־אין פקד אפו ולא־ידע בפש מאד׃ 16ואיוב הבל יפצה־פיהו בבלי־דעת מלין יכבר׃ פ Hebrew OT: WLC (Consonants Only) For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Bible Hub |
    |