Job 23 WLC 1ויען איוב ויאמר׃ 2גם־היום מרי שחי ידי כבדה על־אנחתי׃ 3מי־יתן ידעתי ואמצאהו אבוא עד־תכונתו׃ 4אערכה לפניו משפט ופי אמלא תוכחות׃ 5אדעה מלים יענני ואבינה מה־יאמר לי׃ 6הברב־כח יריב עמדי לא אך־הוא ישם בי׃ 7שם ישר נוכח עמו ואפלטה לנצח משפטי׃ 8הן קדם אהלך ואיננו ואחור ולא־אבין לו׃ 9שמאול בעשתו ולא־אחז יעטף ימין ולא אראה׃ 10כי־ידע דרך עמדי בחנני כזהב אצא׃ 11באשרו אחזה רגלי דרכו שמרתי ולא־אט׃ 12מצות פתיו ולא אמיש מחקי צפנתי אמרי־פיו׃ 13והוא באחד ומי ישיבנו ונפשו אותה ויעש׃ 14כי ישלים חקי וכהנה רבות עמו׃ 15על־כן מפניו אבהל אתבונן ואפחד ממנו׃ 16ואל הרך לבי ושדי הבהילני׃ 17כי־לא נצמתי מפני־חשך ומפני כסה־אפל׃ Hebrew OT: WLC (Consonants Only) For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Bible Hub |
    |