2מפרי פי־איש יאכל טוב ונפש בגדים חמס׃

3נצר פיו שמר נפשו פשק שפתיו מחתה־לו׃

4מתאוה ואין נפשו עצל ונפש חרצים תדשן׃

5דבר־שקר ישנא צדיק ורשע יבאיש ויחפיר׃

6צדקה תצר תם־דרך ורשעה תסלף חטאת׃

7יש מתעשר ואין כל מתרושש והון רב׃

8כפר נפש־איש עשרו ורש לא־שמע גערה׃

9אור־צדיקים ישמח ונר רשעים ידעך׃

10רק־בזדון יתן מצה ואת־נועצימ* חכמה׃

11הונ* מהבל ימעט וקבץ על־יד ירבה׃

12תוחלת ממשכה מחלה־לב ועץ חיים תאוה באה׃

13בז לדבר יחבל לו וירא מצוה הוא ישלם׃

14תורת חכם מקור חיים לסור ממקשי מות׃

15שכל־טוב* יתן־חן ודרך בגדים איתן׃

16כל־ערום יעשה בדעת וכסיל יפרש אולת׃

17מלאך רשע יפל ברע וציר אמונים מרפא׃

18ריש וקלון פורע מוסר ושומר תוכחת יכבד׃

19תאוה נהיה תערב לנפש ותועבת כסילים סור מרע׃

20[כ הלוך] [ק הולכ*] את־חכמים [כ וחכם] [ק יחכם] ורעה כסילים ירוע׃

21חטאים תרדף רעה ואת־צדיקים ישלם־טוב׃

22טוב ינחיל בני־בנים וצפון לצדיק חיל חוטא׃

23רב־אכל ניר ראשים ויש נספה בלא משפט׃

24חושך שבטו שונא בנו ואהבו שחרו מוסר׃

25צדיק אכל לשבע נפשו ובטן רשעים תחסר׃ ף