12לאלה מחלקות השערים לראשי הגברים משמרות לעמת אחיהם לשרת בבית יהוה׃ 13ויפילו גורלות כקטן כגדול לבית אבותם לשער ושער׃ ף 14ויפל הגורל מזרחה לשלמיהו וזכריהו בנו יועץ בשכל הפילו גורלות ויצא גורלו צפונה׃ ס 15לעבד אדם נגבה ולבניו בית האספים׃ 16לשפים ולחסה למערב עם שער שלכת במסלה העולה משמר לעמת משמר׃ 17למזרח הלוים ששה לצפונה ליום ארבעה לנגבה ליום ארבעה ולאספים שנים שנים׃ 18לפרבר למערב ארבעה למסלה שנים לפרבר׃ 19אלה מחלקות השערים לבני הקרחי ולבני מררי׃

20והלוים אחיה על־אוצרות בית האלהים ולאצרות הקדשים׃ 21בני לעדן בני הגרשני ללעדן ראשי האבות ללעדן הגרשני יחיאלי׃

22בני יחיאלי זתם ויואל אחיו על־אצרות בית יהוה׃ 23לעמרמי ליצהרי לחברוני לעזיאלי׃ 24ושבאל בן־גרשום בן־משה נגיד על־האצרות׃ 25ואחיו לאליעזר רחביהו בנו וישעיהו בנו וירם בנו וזכרי בנו [כ ושלמות] [ק ושלמית] בנו׃ 26הוא שלמות ואחיו על כל־אצרות הקדשים אשר הקדיש דויד המלך וראשי האבות לשרי־האלפים והמאות ושרי הצבא׃ 27מן־המלחמות ומן־השלל הקדישו לחזק לבית יהוה׃ 28וכל ההקדיש שמואל הראה ושאול בן־קיש ואבנר בן־נר ויואב בן־צרויה כל המקדיש על יד־שלמית ואחיו׃ ף

29ליצהרי כנניהו ובניו למלאכה החיצונה על־ישראל לשטרים ולשפטים׃ 30לחברוני חשביהו ואחיו בני־חיל אלף ושבע־מאות על פקדת ישראל מעבר לירדן מערבה לכל מלאכת יהוה ולעבדת המלך׃ 31לחברוני יריה הראש לחברוני לתלדתיו לאבות בשנת הארבעים למלכות דויד נדרשו וימצא בהם גבורי חיל ביעזיר גלעד׃ 32ואחיו בני־חיל אלפים ושבע מאות ראשי האבות ויפקידם דויד המלך על־הראובני והגדי וחצי שבט המנשי לכל־דבר האלהים ודבר המלך׃ ף